Mga priso di idayon og balhin

Misamot kalig-on ang baruganan ni Mayor Tomas Osmeña nga dili motugot nga mahinayon ang gilaraw nga pagpabalhin sa bag-ong bilanggo-an sa Kalunasan sa mga pinirisong naghuot diha sa karaang bilanggoan sa Bagong Buhay Rehabilitation Center (BBRC) sa Apas,Lahug.

Mao kini reaksyon ni Osmeña sa nahitabung jailbreak kun pagpuga sa unom ka mga piniriso diha sa BBRC kagahapon sa kaadlawon nga milungag sa paril sa tower-2 nga maoy ilang giagian sa pag-eskapo.

Hinuon nasikop dayun og balik pipila ka oras ang milabay sa piniriso nga si Randy Java ug padayun pang gipangita ang laing lima ka mga pugante nga naila nga sila si Randy Rayala, Edgardo Batanes, Garsul Gabuya, Emeric Abadiano ug Cesar Saban.

Atol sa press conference kagahapon sa udto gibutyag ni Osmeña nga nagpasabot lang kini nga wala pay nahitabong reporma sa maong bilanggoan ubos sa pagdumala ni jailwarden Efren Nemeño.

Gihisgutan og balik sa mayor ang nadiskitaan niyang halapad nga kurapsiyon diha sa maong bilanggoan nga gilambigitan sa mga jailguards nga sakop sa Bureau of Jail Management and Penology (BJMP).

Subling gipadayag sa mayor nga mosugot lang siya nga mabalhin ang maong mga piniriso sa Kalunasan jail kun makumbinser na siya nga nalimpyo na gikan sa kurapsiyon ang maong bilanggoan.