Aballe pasakaag kasong administratiba sa hepe

Kasong administratiba ang ipasaka sa hepe sa kapolisan sa Station 1 sa MCPO batok ni PO2 Iraelito Aballe human kini mobiya sa iyang poste sa Cebu International Convention Center kun CICC nga nahimutang sa Mandaue reclamation area adtong pagkahitabo sa pagpatay sa usa ka lalaki diha sa dakbayan sa Sugbu.

Kini ang pamahayag ni P/Sinsp. Abrahan Ocampo ang Hepe sa station 1 sa kapolisan sa MCPO nga nahinabi sa Banat News.

Matud pa ni Sr.Insp. Ocampo nga human niya masayri gikan sa kauban ni PO2 Aballe nga si PO2 Jimmy Perdigon nga milakaw si Aballe sa iyang poste sa CICC nga wa magpahibalo kung asa paingon kini dakong kalapasan sa lagda sa pamulis gumikan kay misibat kini sa iyang tour of duty.

Matud pa ni PO2 Perdigon nga unang milakaw si Aballe mga alas 9:00 sa gabii kay mopalit og tambal apan nahibalik mga 15 minutos dangtan og 10 minutos milakaw kini pag-usab dihang gipangutana kung asa kini padung, si Aballe giingong wa motubag ug wa na usab kini mahibalik sa iyang pwesto hangtud sa buntag.

Gumikan niini mipagawas og mando si MCPO Director P/Ssupt. Eduardo Catabas sa pagsikop kang Aballe aron makatubag kini sa mga pasangil nga siya ang responsable sa pagpusil patay ni Renato Noble sa Villagonzalo Dos sa dakbayan sa Sugbu sa milabay'ng petsa 23 sa kaadlawon karong bulana.