Magsuon, 5 ug 2, gi-rape

Duha ka managsuon nga batang babaye gilugos sa usa ka ex-convict samtang kini nangatulog sulod sa lawak sa ilang balay nga wala ang mga ginikanan, kay didto sa simbahan sa Baptist duol ra usab sa ilang gipuy-an.

Nahitabo ang pagpanglugos niadtong Martes sa gabii alas 11:30 ang takna didto sa Bonbon, Aloguinsan, Sugbo.

Ang duha ka mga biktima mao sila si Maria, 2 anyos ug Lou, 5, tinuod nga pangan gipugngan, nga nanimuyo sa maong lugar.

Samtang ang gitumbok nga milugos sa duha ka bata giila sa kapolisan mao si Joseph Cedentario, 35, ulitawo, ex-convict, lumad nga taga Magsaysay, Toledo ug kasamtangan nagpuyo sa balay sa iyang iyaan sa Bonbon.

Ang inahan ug amahan, samtang didto sila sulod sa simbahan sa Baptist, pipila ka minutos ang nakalabay nakadungog og tiyabaw sa bata, hinungdan nga nipauli sa ilang balay ang inahan.

Sa dihang misulod na ang inahan, iyang nakita ang suspetsado nga naglingkod ug nagsabak sa iyang usa ka anak babaye, samtang ang usa nagpunay og hilak diha sa katre, namatikdan usab sa inahan nga nanimahong rubbing alcohol ang bilahan ug ang kinatawo sa duha niini ka mga bata, ug duna pay semilya nga gituohang iya ni Cedentario nga diha sa kinatawo sa mga bata.

Si Emmanuel Ansit, pastor sa Baptist sa maong lugar maoy nagpahibalo sa kapolisan mahitungod sa nahitabong pagpanglugos.

Sila si SPO1 Nestor Manalo ug PO3 Justo Sosmeña sa Aloguinsan daling miadto sa dapit, ug ilang nasikop si Cedentario.

Sa gihimong eksaminasyon sa medico legal sa duha ka mga bata, nasuta nga aduna gyuy gisi ang mga kinatawo sa bata agi sa gahi nga butang nga gipugos og pasulod ngadto sa ilawo.

Kagahapong adlawa gidala na sa kapolisan si Cedentario ngadto sa Provincial Prosecutors Office aron ipasaka ang kasong rape batok kaniya. - Uban sa report ni Romeo Limpangog 2 pusher nasikop

Duha ang nasikop kinsa gidudahang tigpayuhot og ilegal nga drugas atol sa ronda sa Provincial Anti-Illegal Drugs Service Operations Task Group sa lungsod sa Lilo-an sayo kagahapon sa kadlawon.

Ang team sa PAIDSOTG nga gipanguluhan ni P/Insp. Bonifacio Arriesgado ang nipahigayun ronda alas 12:45 kagahapon sa kaadlawon sa San Vicente, lungsod sa Lilo-an.

Ang pagpangronda niresulta sa pagkasikop nilang Manny Regis alyas Manic ug Violeta Duhaylungsod kinsa nagpuyo ra sa maong lugar.

Ang pagpangronda gipasikad sa warrant of arrest nga giluwatan ni RTC Judge Ulric Cañete sa dakbayan sa Mandaue.

Usa sa mga subjects nga si Ehepras Regis alyas Tatay Pepe ang wala maabti atol sa ronda ug nakalikay sa pagkasikop.

Nasakmit sa panimaye sa mga Regis ang duha ka gagmay'ng pakete sa shabu, cellphone ug mga kagamitan sa paghingos sa shabu.

Samtang sa panimaye ni Duhaylungsod nasakmit ang usa ka dakung putos nga shabu ug kwarta nga P650.

Ang mga ebidensiya ang gipa-eksamin pa sa Crime Laboratory sa kapolisan samtang ang mga dinakpan ang kasamtangang gitanggong sa selda sa kapolisan ug nagpaabot nga mapasakaan sa tukmang kaso.-Gregg M. Rubio ug Rhea Papas