Positibo's pulbora ang polis

Polis nga gitumbok nga maoy mipatay sa usa ka lalaki diha sa Villagonzalo 2 niadtong milabay'ng Lunes migawas nga positibo sa 'paraffin test' nga gihimo kaniya sa PNP Crime Laboratory.

Si Inspector Mario Monilar ang hepe sa Homicide Section mitug-an sa Banat News nga positibo sa gunpowder residue ang tuong kamot ni PO2 Esraelito Aballe nga timaan nga posibleng nakapabuto kini og armas.

Si Aballe kinsa sakop sa Station 1 sa Mandaue City Police Office nadestino sa kasamtangang gihimong Cebu International Convention Center sa dakbayan sa Mandaue.

Ang biktimang si Renato Noble nga nakaangkon og usa ka samad pinusilan diha sa iyang buko-buko nga milapos diha sa walang dughan nakadagan pa sa iyang balay diin gisugat kini sa iyang kapuyo ug igsuong mipasuwat kaniya sa pangalan sa mipusil kaniya ug gitamlaan pa niya kini og dugong miawas sa iyang samad.

Matud pang Monilar nga dako og ikatabang sa kaso ang resulta sa paraffin test, samtang wala mosugot si Aballe nga ipailawom sa drug test niadtong Martes human siya positibong gitumbok sa kapuyo ni Noble.

Ang Mandaue City Police Office na ang pabut-on ni Monilar sa pagpasaka og kasong administratiba kang Aballe gumikan sa pagdumili niining magpailawom sa drug test.

"Mo-corroborate ang resulta sa paraffin statement sa witnesses nga nakapabuto gyud siya og armas," asoy pang Monilar.

Niadtong Miyerkules nasang-at na sa piskalya ang kasong murder batok kang Aballe.

Samtang gipaabot usab ang resulta sa ballistics examination sa armas ni Aballe nga kalibre 9mm sa slug nga narekober diha sa crime scene.

Ang tamla ug suwat-kinamot sa biktima i-cross-matching usab sa fingerprint ug handwriting specimen sa biktima aron matino kung iya ba gyud kadto nga agi.