Ang maong lote nga adunay gilapdon nga sobra sa 38 ektarya nga gigamit karon sa military nalakip sa 47 ka lote.
Kagahapon sa buntag si Bagasin miduso sa iyang hangyo ni Gobernador Gwendolyn Garcia. Si Bagasin mirekomendar nga ang sobrang 33 ka ektarya nga giokupar sa mga squatter mao lang ang bawion sa probinsiya.
Ang 47 ka lote mokabat sa 80 ektarya ang kinatibuk-ang gilapdon niini.
Ang nahisgutang problema napaabot na usab ni Bagasin sa General Headquarters sa armed forces of the Philippines
Si Garcia mibutyag kagahapon nga ang probinsya ug si Cebu City Administrator Francisco Fernandez nagkasabot nga ang Central Command maoy mohatag og security sa lote para dili kini mapatukoran og bisan unsa nga mga edipisyo o duna squatter pa nga makasulod niini hangtod nga masulbad ang nahisgutang problema.
Ang kagamhanan sa Sugbo adunay orihinal nga lista sa sobra 900 ka pamilya nga gihatagan sa pagtugot nga makabenepisyo sa presidential proclamation.
Kahinumduman nga ang presidential proclamation nagdeklarar nga ang 32 ektaryang gilapdon sa luna gamiton alang sa urban poor housing.
Niadtong Oktubre 12, 1959 adunay deed of donation ang kagamhanan sa probinsiya kabahin sa lote nga gilagdaan ni kanhi Gobernador Jose Briones nga nagkanayon kun ang maong lote gamiton gawas sa military purposes bawion kini sa probinsiya sa Sugbo.
Ang administrasyon ni kanhi Gobernador Vicente dela Cerna aduna nay gipasar nga resolusyon sa hunta probinsiyal sa pagbawi sa maong lote tungod kay ang tibuok luna niini wala magamit sa military purposes.