Ang pagpamusil ug pagpanunggab nahitabo sa managlahing takna niadtong miaging gabii sa Sitio Sliding Hills, Labogon, Mandaue.
Ang gipamusil mao sila si Edwin Armodia, 35 anyos, ulitawo ug Allan Liguin, hingkod ang panuigon nga pulos minyo ug mga lumolupyo sa maong dapit.
Ang namusil mao si Judito Macellano, hingkod ang panuigon, minyo ug silingan usab sa mga biktima sa maong dapit.
Si PO3 Lino Baylosis sa Presinto 3 sa Basak Police Station sa Mandaue City Police Office (MCPO) nga gikahinabi sa Banat News ang miingon nga hubog ang suspetsado ug kalit kining nag-wild.
Matud pa ni PO3 Baylosis nga nakit-an sa suspetsado ang duha ka biktima nga nagkanta-kanta og videoke kay naglingawlingaw sa ilang pagsaulog sa piyesta maoy gipuntariya sa pagpusil .
Si Armodia nga dali kaayong nakapasalipod sa bongbong wala maigo ug si Liquin nga kuyog sa maong panag-inom nga dali kaayong nakalukso ang naigo gayod ang tiil.
Samtang si Gerry Dy, 25 anyos, nagpuyo usab sa maong dapit nga mipauli gikan sa gipasiugdahang disko ang kalit lang gisugat sa wala mailhing lalaki ug gidunggab.
Gipasabot ni PO3 Baylosis nga wala gyod mailhi sa biktima ang suspetsado nga nakadunggab sa biktima ug dali usab nga nakasibat pahilayo sa maong dapit .