Tulo ka sakyanan nagdasok

Mga sakyanan nagdasok dihang usa kanila ang nawad-an og preno nga miresulta sa pagkaangol sa tulo ka mga tawo lakip na mga drayber sa maong mga sakyanan niadtong milabay'ng Biyernes sa buntag diha sa lungsod sa Consolacion.

Nawad-an og preno ang pasaheruang mini-bus gimaneho ni Jesus Batucan, 52, ug misampak sa gimanehong pribadong sakyanan ni Melchor Arinas,32, taga Taboc Lamac, Liloan.

Ang maong minibus gikan sa lungsod sa Carmen padulong sa dakbayan sa Sugbu dihang nahitabo ang aksidente, lakip sa naigo mao ang usa ka L300 van nga gimaneho ni Romulo Ygot nga taga Tugbongan, Consolacion.

Si SPO1 Romulo Sasing nga nahinabi sa Banat News, miingon nga nakaangol usab og tulo ka tawo ang maong pasaheruang sakyanan nga kasamtangang nagbarog-barog diha daplin sa dalan nga giilang sila si Carlito Castillo, Dindin Valle ug Teresita Likanda nga gidali pagdala sa tambalanan.

Kasamtangang natanggong na karon sa Consolacion Police Station ang naasoy'ng drayber.