Kapolisan sa CCPO gisurpresa'g bisita sa hepe sa PRO-7

Kapolisan sa Cebu City Police Office diha sa Camp Sotero Cabahug nasurpresa sa kalit nga pagbutho sa bag-ong heneral sa Police Regional Office 7 kagahapon sa buntag.

Nakugang nalang ang Executive Senior Police Officer sa CCPO nga si SPO4 Emerson Gallos dihang kalit nga mibutho si Chief Supt. Silverio Alarcio diha sa ilang buhatan nga wala magpahibalo.

Gipangita ni Alarcio si Supt. Melvin Gayotin apan wala kini sa iyang buhatan gumikan kay mitambong kini sa sinemanang Police Coordinating and Advisory Council, maong iyang gimanduan si Gallos sa pagpatawag sa luyo-luyong hepe ni Gayotin nga si Supt. Mariano Natuel.

Apan sama ni Gayotin giingong mitambong sa usa ka panagtigum sa Board sa City Traffic Office Management ang maong opisyal hinungdan nga gipangita ni Alarcio ang operations chief nga si Chief Insp. Anecito Perandos apan "on leave" ang maong opisyal maong si Sr. Insp.Renero Agustin ang luyo-luyong hepe niini maoy miatubang.

Nianang tungora padulong na mogawas si Alarcio sa maong kampo aron pag-adto sa Civil Service Commission sa Lahug.

Si Gallos nagkanayon nga wala sila mag-expect nga mobisita ang bag-ong direktor , giingong dihang naagi ang sakyanan ni Alarcio atubangan sa CCPO nasigpatan niini ang kampo ug kalit nga midesider pagbisita niini.

Gibutyag ni Alarcio nga kun wala siya'y buhaton sa iyang buhatan iyang batasanon ang pagbisita sa mga police stations o ba kaha mga kampo sa kapolisan.

Human sa CCPO milahos ang heneral sa Cebu Provincial Police Office diin iya usab gisurpresa ang maong buhatan. Wala si Sr. Supt. Vicente Loot sa maong kampo bugtong si PIIB chief Juanito Enguerra maoy miatubang kang Alarcio.