Bata patay sa kilat

Patay diha-diha ang usa ka 13-anyos human kini maigo sa kilat ug laing duha ka igsoon niini ang naangol niadtong Miyerkules sa hapon diha sa Barangay Kanaw-Kanaw lungsod sa Tabogon.

Ang namatay mao si Welito Toling kinsa nakaangkon og grabeng kadaot sa lawas.

Ang manghod ni Toling nga si Junel, 11-anyos, nakaangkon og third degree burn ug si Galiner kinsa usa ka tuig ug unom ka buwan na-trauma pa kini sa hitabo.

Si Junel ug Galiner daling gidala sa Juan Dosado District Hospital sa Sogod apan tungod sa ilang mga kahimtang gibalhin sa usa sa mga tambalanan niining dakbayan.

Ang kagamhanan sa probinisiya sa Sugbo misaad og hinabang sa pamilya sa mga nabiktima.

Matud ni Gobernador Gwendolyn Garcia kagahapon nga aduna na siya'y gisugo og tawag sa buhatan sa mayor sa lungsod para mapaabot ang hinabang sa pamilya sa biktima.