Si PNP director Arturo Lomibao namahayag niini kagahapon atol sa turn-over ceremony diin si Chief Supt. Eduardo Gador gihulipan ni Chief Supt. Silverio Alarcio, Jr. isip direktor sa Police Regional Office sanglit kutob nalang sa Mayo 23 ang serbisyo sa taga Mambaling, Cebu City nga si Gador.
Si Alarcio matud pa usa ka "Operations Guy" ug nasinati sa natad sa seguridad sa mga dagkong kalihukan, gani si Alarcio maoy usa sa mga security planners sa milabay'ng 1996 Asia Pacific Economic Conference, maoy nagpahiluna sa kaluwasan ni anhing John Paul II pagbisita niya dinhi niadtong 1995.
Makaduha na ka higayon nahimong hepe sa Special Action Force sa PNP si Alarcio ug miagi na og pagbansay sa Federal Bureau of Investigation sa Estados Unidos ug ubang counter-terror training ug hostage negotiations training gani siya maoy kanunay'ng kuyogon ni kanhi Presidente Fidel Ramos sa ubang kanasuran.
Mismong si Cebu City Mayor Tomas Osmeña mirekomendar ni Alarcio kang Presidenti Gloria Macapagal Arroyo human sila nagkauban sa pagtambong sa Asean Summit sa Malaysia sa niaging tuig.
Si Alarcio gradwado sa Philippine Military Academy "Magilas" class 76 diin kauban niya sila si Chief Supt. Jaime Caringal sa PRO-9, Chief Supt. Jose Antonio Salvacion, Chief Supt. Napoleon Cesante, Chief Supt. Joel Gultiao ug Chief Supt. Leopoldo Batauel nga nagkupot usab og mga tag-as nga pwesto sa PNP.