Hero's welcome nagpaabot ni Leo Oracion

Hatagan og "hero's welcome" sa kagamhanan sa dakbayan sa Mandaue ang usa sa mga lumolupyo niini nga nakasaka sa labing taas nga bukid sa tibuok kalibutan nga Mt. Everest sa Nepal ug milampus gyod sa pag-ugbok sa bandilang Pilipino.

Si Mayor Thadeo Ouano sa pagpakighinabi sa Banat News miingon nga talagsaon kaayo ang kalampusan nga naangkon ni Leo Oracion kinsa nagpuyo sa Deca Home sa Cubacub, Mandaue.

Dugang pa niya nga bayanihon kaayo ang gihimo ni Oracion sanglit kinabuhi man ang gitaya bugti sa kadungganan nga ikahatag niini sa mga Pilipino.

Si Gobernador Gwendolyn Garcia, sama kang Ouano, mipadayag og kahinangop ug gikatakda usab nga mohatag og pasidungog nga "Garbo sa Sugbo" sa Founding Anniversary karong Agosto niining tuiga.

Si Ouano miingon nga ang paghatag og pasidungog nga pagahimuon sa kagamhanan sa maong dakbayan ipakita sa paghidangat pa sa Mactan Cebu International Airport (MCIA) sa dakbayan sa Lapu-Lapu pinaagi sa pagsugat niini og banda.

Sumala pa niya nga mao na kini ang naandan nga gihimo sa kagamhanan sa maong dakbayan sa pag-ila ug pagpasidungog niadtong mga lumolupyo nga nagmalampuson sa ilang pagpaninguha nga makahatag og dakong garbo sa mga Mandauehanon.

Gipasabot niya nga ang kalampusan nga naangkon ni Oracion maoy nagpaila sa mga kinaiya ug taras sa mga Mandauehanon nga maisogong makigharong taliwala sa masinati nga kalisod.

Nunot niini si Konsehal Allan Borbajo nga district councilor ug silingan ni Oracion sa Cubacub maoy gitahasan ni Ouano sa paghimo og mga pagpangandam alang sa pagpasidungog niini ug lakip na ang cash incentive gikan sa kagamhanan sa maong dakbayan.

Sa nasayran nga si Oracion nga sakop sa Habagat team ug Mountain Search and Rescue Team of the Philippines ang lumad nga taga Lukban, Quezon.

Naminyo kini og taga Dalaguete sa lalawigan sa Sugbo ug nagtrabaho sa dakbayan sa Lapu-Lapu ug nagpuyo kapin sa napulo na ka tuig sa Cubacub.