K-9 dogs sa CH magsuroy sa mga dagkong tindahan

Hingusgan sa kagamhanan sa dakbayan sa Sugbo ang pag-monitor sa mga malls ug mga publikong lugar dinhi sa dakbayan sa Sugbo isip kabahin sa pagpalig-on sa seguridad batok niining hulga sa pagpamomba gikan sa mga gidudahang sakop sa teroristang pundok.

Matud ni Konsehal Sylvan Jakosalem mao kini karoy tumong niining pagpakatap sa upat ka mga K9 dogs nga gi-abangan sa siyudad gikan sa K9 lucky-7 company nga nagbase sa Bacolod.

Matud ni Jakosalem dihang nahinabi sa Banat News nga sila maoy boluntaryong nitanyag sa mga tagdumala og mga dagkung establisamento sama sa mga malls nga tugotang makasulod ang gi-abangan nga mga K9 dogs sa siyudad aron masusi ang palibot niini kon luwas ba gikan sa hulga nga posibling pagpamomba.

Gipasabot sa konsehal nga ang mga gi-abangan nga K9 dogs sa siyudad duna kini igong katakus pag-ila og mga eksplosibo ilabi na gyud sa bomba ingon man mo-atake usab kini niadtong mga dautang elemento.

Mokabat sa tag P30 mil ang abang sa siyudad matag bulan sa matag usa ka iro apil na ang handler niini.

Matud sa konsehal nga niadto pa kining miaging tuig giabangan sa siyudad og gani gigamit kini sa pag-roving sa lain laing mga sam-ang niadtong milabay'ng kalag kalag.