Da Vinci Code babagan masalida

Mipadayag og pagsupak ang Simbahang Katoliko Romano sa Sugbo niining pag-aprobar sa Movie and Television Review and Classification Board (MTRCB) aron ikapasundayag sa mga sinehan dinhi sa nasud ang pelikula nga giulohan og "The Da Vinci Code".

Gipadayag ni Dr. Rene Josef Bullecer direktor sa Human Life International nga karong semanaha gitakdang mo-apod-apod ang Archdiocese sa Sugbo ug mga leaflets nga maghatag og impormasyon sa publiko may labot sa maong pelikula.

Nunot niini misulat na si Bullecer ngadto kang Maria Consoliza Laguardia-chairman sa MTRCB, nga gipadala kagahapong adlawa aron ipalanog ang pagsupak sa desisyon sa MTRCB nga ipasundayag ang maong pelikula sa mga sinehan dinhi sa nasud.

Nasayran nga karong adlawa gitakdang ipasundayag na sa mga sinehan dinhi sa Sugbo ang maong pelikula.

Matud ni Bullecer nakahatag og negatibong epekto sa mga Katoliko Romano maong pelikula ilabina kay halos 80 porsiyento sa mga Pilipinhon ang mga katoliko.

Alang kang Bullecer usa kini ka matang sa pelikula nga mi-atake ug nagbulingbuling sa Kristyanismo ug labaw sa tanan usa ka pagbugal bugal sa kabalaan sa labaw'ng makagagahum.