Bomba nakuykoyan

Bomba nakuykoyan sa usa ka residente sa Calmaran, Basak, Compostela kagahapon sa buntag.

Personal nga midala sa bomba ngadto sa kapolisan si Benjamin Capangpangan Sugabo, 44, minyo ug residente sa maong dapit human kini iyang nakuykoyan duol sa iyang panimalay.

Matud pa ni Sugabo samtang naghimo siya og lungag isip pundasyon alang sa paghimo og extension sa iyang panimalay kalit lang dunay mihagting sa ilawom nga bahin sa yuta.

Dihang lapad na ang pagkakalot niini iyang nasuta nga usa ka bomba sa panahon pa sa ikaduhang gubat ang iyang nakuykuyan hinungdan sa paghatud niini ngadto sa buhatan sa kapolisan sa lungsod sa Compostela.

Matud pa ni SPO3 Tirso Lima, imbestigador sa Compostela Police Station nga wala nay angay nga kabalak-an ang maong bomba gumikan kay ila na kining gitugyan sa Cebu Provincial Police Office alang sa dugang eksaminasyon.

Gibanabana ni SPO3 Lima nga adunay 7 cm ang gilapdon ug 29 ka pulgada ang gitas-on sa maong bomba nga gitawag nga "vintage bomb" sa ikaduhang gubat sa kalibutan.