Bag-ong customs memo gikalibog sa CIIS, ESS

Naglibog ang mga sakop sa law enforcement sa buhatan sa adwana kun unsay balaod nga ilang sundon sa paghimo og mga operasyon sa mga ilegal nga palusot sa mga kargamento.

Nasayran sa Banat News nga dunay giluwatang memorandum order 10-2006 si BOC Commissioner Napoleon Morales nga pinetsahan niadtong Marso 29 ning tuiga nga naglatid sa "special rules prescribing the exercise and conduct of examination, searches and seizures pursuant to the provisions of section 2536 of the tariff and customs code of the Philippines, as well as the custody of goods seized as incident thereto".

Ang maong memorandum nakapalibog sa atong mga sakop sa enforcement units sa customs sama sa Customs Intelligence and Investigation Section ug Enforcement & Security Service ug uban pang units sa enforcement gumikan sa kadaghan sa kinahanglanon sa dili pa himuon ang implementasyon sa pagronda sa usa ka gikadudahang illegal shipment.

Usa na niini ang nakalatid sa section 5 paragraph 1 sa maong memorandum diin sa dili pa mohimo og mga lakang sa pag-conduct o pag-exercise og visitorial power ang usa ka enforcement units sa BOC kinahanglang mangayo una kini og letter of authority kun LOA ngadto sa BOC commissioner.

Base sa pamahayag sa mga enforcers nga nahinabi sa Banat News langay na kaayo ang maong proseso gumikan kay mahimo na unyang nakalusot ang usa ka smuggled goods nga direktang nasigpatan sa mga BOC enforcement units kun hulaton pa ang maong mga pamaagi sa maong memorandum.

Dako usab kini og sagpa unya sa BOC kun makalusot ang mga smuggled goods ug nasikop sa laing units nga adunay susamang kampanya sa pagsumpo sa smuggling dinhi sa nasud ug kini gumikan lang sa kalangay sa mga prosesong gisunod sa BOC.

Hinuon mipasalig si Customs Subport of Mactan Collector Atty. Ernesto Urbano nga iya unang sutaon pag-ayo ang maong memorandum ngadto sa buhatan ni Commissioner Morales aron mapasabot niini ang enforcement units.