Lider sa RSM gradwado sa UP-High School sa Cebu

Giingong lokal kontak ug maoy gidudahang lider sa Rajah Sulaiman Movement nga mianhi sa Sugbu niadtong milabay'ng Huwebes giingong migradwar sa UP-High School sa Lahug ning dakbayan niadtong tuig 2000.

Si Dinno Amor Rosalejos Pareja base sa rekord niya sa UP-High gipanganak niadtong Hulyo 19, 1981 sa Sariaya, Quezon Province ug nagpuyo sa Hermag Village, barangay Basak dakbayan sa Mandaue.

Si Pareja maoy gitumbok ni Sr.Supt. Agusto Marquez sa interbyu kagahapon sa buntag sa DyAB nga gipangita karon sa kapolisan gumikan kay kini maoy gidudahang kauban ug lokal nga kontak sa mga napatay nga sila si Ali Usop alyas Datu Ismael Usop ug Datu Niel Ulama alyas Viktor Jimenez niadtong Huwebes sa gabii.

Sumala pa sa kapolisan migamit na sa pangalang Ahmad Mohammad Khalil si Pareja ug gihulagway nga mao nay mipuling lider sa RSM karon human madakpi si Hilarion del Rosario Santos alyas Ahmad Santos ang mitukod sa teroristang grupong RSM sanglit giingong ang asawa sa naulahi igsuon ni Pareja.

Ang faculty sa UP nga gikahinabi sa Banat News nga dili buot mopaila nagkanayon nga ulahing mibisita sa ilang tunghaan si Pareja tulo na ka tuig ang nakalabay diin nagbitbit kini og "Koran," ang balaang libro sa relihiyong Islam.

"Nagdala-dala lagi to siya og Koran, unya akong gipangutana nitubag man nga mo-travel kuno siya sa mga Middle East kay mo-"spread the word" daw siya, serious man siya kaayo," sumala pa sa maong magtutudlo kinsa mibutyag nga wala sukad-ma- sukad mapahamtangi og disciplinary action si Pareja gawas lang sa usa ka insidenteng gisupak niya ang iyang maestra.

Si Pareja gihulagway nga hilumon, putong ug di kaayo makigsagol sa iyang mga classmate, gani matud pa nga gibansagan kini sa ubang mga classmate niini og "Abu Sayyaf," apan duna kini talento sa drums.

Niadtong adlaw sa graduation sa batch nila ni Pareja "gibawsan" niini ang iyang magtutudlo kinsa mao ang napatugtog sa organ samtang gitukar ang "UP Naming Mahal," si Pareja maoy mitukar sa drums apan nakugang ang maong magtutudlo dihang kalit nga gi-"rock" ni Pareja ang drums imbes sa hinay nga tempo.

Giingong dunay panagbangi ang magtutudlo ug si Pareja pila ka adlaw una pa ang graduation apan wala damha sa maong magtutudlo nga nagdumot kaniya si Pareja.

Natapos ni Pareja ang elementarya diha sa Basak Elementary School sa Mandaue City ug ang ginikanan niya negosyante.