Ang nadakpan mao ang managsuong Dimpas nga sila si Paulino, 40 ug Florante, 37 nga nagpuyo sa Zone Pechay, Paknaan, siyudad sa Mandaue.
Laing nadakpan mao si Ramil Brigoli, hingkod ang panuigon, minyo nga nagpuyo sa Labogon sa maong siyudad nga giingong mao usab ang tigpayuhot og ginadiling drugas sa maong dapit.
Ang team sa Vice Control Section sa kapolisan sa Mandaue City Police Office (MCPO) pinangulohan ni PO2 Bruce Gairanod ug Philippine Drug Enforcement Agency (PDEA-7) maoy nakadakop sa mga suspetsado.
Si PO2 Gairanod nga gikahinabi sa Banat News nga naglayog gyud sila sa magsuong Dimpas hinungdan sa ilang mga pangos atol sa pagsikop kanila.
Ang maong mga dinakpan ug ang mga ebidensiya nga nasakmit gikan kanila ang gipresentar kagahapon ni Senior Superindent Eduardo Catabas, direktor sa MCPO ngadto sa mga sakop sa media.
Ang mga ebidensiya nga nasakmit mao ang 12 medium nga gidak-on ug usa ka dakong putos nga pulos may sulod nga gidudahang shabu, P44,000 nga salapi, cellphone ug mga paraphernalia.
Usa ka Anthony Castro, 30, minyo nagpuyo sa V. dela Serna Street Poblacion, Dumanjug ang nadakpan sa buy bust operation sa kapulisan niadtong Sabado sa gabii pinanguluhan ni SPO4 Juan Casipong .
Nagpakaaron ingnon nga mopalit og shabu ang mga polis gamit ang marked money nga P200, pagtunol ni Castro sa duha ka putos nga gituohang shabu, giposasan dayon ang suspetsado.
Nakuha nga mga ebidensiya mao ang 21 ka putos, usa ka medium nga pulos may sulod nga gidudahang shabu, drug paraphernalia, P900 nga kuwarta, ug motorsiklo ni Castro.
Si SPO1 Ciriaco Luab sa Dumanjug Police Station sa pakighinabi sa Banat News niingon nga usa si Castro sa watchlist sa mga drug personalities sa ilang lungsod.
Nagtingkagol usab sa prisohan si Rowena Lima Vasquez, 39, atol sa ronda sa kapolisan sa Talisay diha sa Barangay San Roque niadtong milabay'ng gabii.
Gipangulohan ni SPO1 Edgar Causon sa Intelligence Operatives nakuha ang 5 ka pakete nga gituohang may sulod nga shabu nga gitaguan sulod sa karton sa floorwax. - Romeo Limpangog uban sa taho ni Rey Pasaporte