Gikonpirmar ni konsehal Sylvan "Jack" Jakosalem nga mao kini ang upat ka mga bomb sniffing dogs nga gi-abangan sa siyudad gikan sa Negros gikan pa niadtong kalag- kalag sa milabay'ng tuig hangtod karon.
Pormal nga nisugod ang pag-deploy sa maong mga iro nga makamaong mangita sa mga bomba ug bisan unsang klase sa eksplosibo niadtong Sabado pipila ka adlaw human nadiskobrehan ang usa ka bomba nga gibilin sa gawas nga bahin sa SM City Cebu niadtong Miyerkules sa udto sa miaging semana.
Ang maong mga iro nga gi-abangan sa siyudad og linibo ka pesos matag bulan magpadayun na kini sa ilang monitoring sa mga dautang elemento sa mga malls ug mga dagkung establisamento dinhi sa dakbayan hangtud na sa pagkahuman sa upat ka adlaw nga Asean Summit nga ipahigayun gikan sa petsa 11 hangtud sa 14 sa Disyembre.
Gibanabanang mokabat sa 17 ka mga heads of state gikan sa lainlaing kanasuran ang gitakdang mosalmot sa maong international nga kalihukan.
Gipahibalo ni Osmeña nga nipasalig na ang kahugpungan sa mga Muslim dinhi sa Sugbo nga motabang sa programa niining gilusad ang bantay silingan nga gitumong aron pagmonitor niadtong mga tawong kadudahan ang linihukan nga moabot dinhi sa Sugbo nga gikabalak-ang magmugna og kagubot sa maong okasiyon.