4 brgy gilubloban og prostitusyon, drug runner

Laing upat ka barangay sa dakbayan sa Sugbo ang giila sa usa ka non-government organization nga lugar sa prostitusiyon sa kabataan ug ang uban gihimong runner sa negosyo sa ilegal nga drugas.

Kini ang gibutyag ni Fe Segismar, project coordinator sa Nazareth Children Center nga nagbase sa dakbayan sa Sugbo.

Matud pa ni Segismar atol sa niaging Kapihan ni Ate Glo sa Norkis Center sa North Reclamation Area nga ang kabataan nga nalambigit sa gitawag og sex workforce ang ila karong gitutukan.

Popular niini ang barangay Kamagayan syudad sa Sugbo diin nagsagol ang mga hamtong ug mga bata nga ubos sa 18 anyos nga nalambigit na sa maong trabaho.

Apan matud pa ni Segismar nga gawas sa maong barangay, duna na sila'y naila nga 83 ka mga bata nga apil sa prostitusiyon sa barangay Pasil, Suba, Ermita ug Carreta duol sa Pier 6.

Kun sa barangay Kamagayan gipasagdan nalang sa mga ginikanan ang ilang kabataan, sumala pa ni Segismar nga sa nahisgutang upat ka barangay, wala masayud ang mga ginikanan sa kalihukan sa ilang mga anak base sa ilang pakisusi.

Gipasabot ni Segismar nga ang mga batan-on nga nalambigit sa prostitusiyon nadala sa ilang mga higala.

Gani mga mahuyang ang sagad namugaw sa mga batan-ong babaye ngadto sa mga kustomer.

Gawas sa prostitusiyon, matud pa ni Segismar nga gigamit usab ang mga batan-on isip runner sa negosyo sa ilegal nga drugas.

Base sa pakisusi, labing batan-on nag-edad pa lang og 12 anyos ang nisulod na sa prostitusiyon.