'Bombers ' sa Recla terosrista gyud

Gikonpirmar sa kapolisan nga sakop gyud sa teroristang grupong Rajah Sulaiman Movement ang duha ka mga napatay]ng lalaki diha sa North Reclamation Area niadtong Huwebes sa gabii.

Si Criminal Intelligence and Investigation Branch chief, Pablo Labra sa pakighinabi sa Banat News kagahapon mibutyag nga kumpirmadong sakop sa RSM ang duha ug kauban sa mga gipangitang miyembro sa Marikina niadtong milabay'ng buwan.

Gisubay na usab karon sa kapolisan ang giingong kauban nila ni Ali Usop alyas Datu Ismael Uso ug Datu Niel Ulama alyas Viktor Zimenez nga nakigpinusilay sa mga sakop sa Cebu City Police Office.

Matud pang Labra nga kinahanglang makita ang kauban sa duha sanglit hulga gihapon kini sa seguridad gumikan kay usa kini ka grupo nga dunay rekord sa pagpamomba kaniadto pa.

Samtang gikumpirmar usab ni Labra nga hinimo sa grupong RSM ang bombang nakuha diha duol sa SM department store niadtong Huwebes base sa paagi pag-assemble niini nga gitandi sa mga naunang narekober nga mga hinimo ug gipanggamit nga materyales paghimo sa RSM og bomba.

"One hundred percent sure that the bomb (narekober) is a kind that only the RSM made, but as to where they acquire the materials, ato panang gi-check," asoy pang Labra.

Ang duha matud pang Labra dunay mga kasong nag-ungot diha sa Department of Justice kalabot sa mga nangaging pagpamomba ug pagpangronda nga miresulta pagkakuha og mga gamit sa paghimo og bomba.

Nasuta sa gihimong pakisusi sa Data Bomb Center sa kapolisan gikan sa Manila ug PNP Crime Laboratory nga ang latent prints nga nakuha diha sa bombang narekober niadtong Huwebes mitakdo sa fingerprint ni Usop.

Giklaro usab ni Labra nga wala maggikan sa kapolisan ang pulong nga "Muslim" gyud ang duha gumikan kay nasayod sila sa implikasyon ug impact niini ngadto sa ubang mga Muslim .

Apan gipasabot ni Labra nga ang mga sakop sa RSM mga "Balik-Islam" kun kadtong Kristiyano kaniadto nga misalikway na sa maong relihiyon ug mibalhin sa relihiyong Islam nga mao usab ang relihiyon sa mga muslim.

Hangtud karon wala pay bisan usa ka kabanay nga mi-claim sa patay'ng lawas sa duha ka mga suspek diha sa Cebu Eternal Homes.