Kapin sa libo child laborer sa Medellin

Kapin sa usa ka libo ka mga bata ang natala sa Department of Labor and Employment nga nanarbaho sa katubhan sa lungsod sa Medellin.

Kini ang gibutyag ni Bernie Alverio, project coordinator sa Plan International, non-government organization nga nakig-alayon sa DOLE-7 sa pagmonitor sa kabataan nga anaa sa mga bug-at nga trabaho.

Matud pa ni Alverio nga kadaghanan sa kabataan nga gipatrabaho sa katubhan sa lungsod sa Medellin nahimutang sa pakyaw-pakyaw diin kauban ang ilang mga ginikanan sa pagtrabaho.

Base sa ilang pakisusi nga kadaghanan niini wala na makahuman sa pagtungha ug hinay usab ang pagtubo sa ilang panglawas gumikan sa kabug-at sa trabaho.

Samtang gipahibawo ni Antonio Torrevillas, district supervisor sa Department of Education sa lungsod sa Medellin nga ila na karong gihingusgan ang advocacy campaign ngadto sa mga ginikanan uban sa Plan International.

Matud pa ni Torrevillas nga usa ka task force ang gihulma diin apil na ang mayor ug mga barangay kapitan.

Tuyo sa kampanya nga mapasabot ang mga ginikanan sa kamahinungdanon sa pagpatubo ug pagpaeskwela sa ilang kabataan.

Sagad sa hinungdan nga gipatrabaho sa mga ginikanan ang ilang kabataan sa industriya sa tubo mao ang kalisud sa panginabuhi.

Ang Plan International ang nitubag sa panginahanglan sa kabataan sa pagtungha aron dili na mahimong rason nga dili sila paeskwelahon sa mga ginikanan.

Sumala pa ni Torrevillas nga ang mga asyendero naghatag na usab og scholarship sa kabataan lakip na ang hospitalization.

Gipasabot ni Maria Nancy Abad, chief labor and employment officer sa DOLE-7 nga pagpasabot una sa mga ginikanan ang ila karong gihimo ilabi na sa informal sector.

Matud pa ni Abad nga dili nila mahimong silutan dayun ang mga ginikanan ug ang mga amo sa panarbaho hangtud nga ila na nga mapasabot lakip na sa mga balaud sa pamuo.