Deperensiyado namato gipusil

Usa ka deperensiyado og pangisip napusilan sa mirespondeng polis human kini ireklamong namato sa mga motorista nga nangagi duol sa Cebu Port Authority sa North Reclamation Area ning dakbayan niadtong milabay'ng hapon.

Ang napusilan giilang si Roberto Aranez, 25, ulitawo residente sa Gaas, Balamban dihang iyang gigukod si PO3 Roy Jayme sa Mobile Patrol Group bitbit ang usa ka icepick .

Ang MPG nakadawat og alarma kabahin sa tawong nanghasi diha sa maong dapit ug namato sa mga pribadong sakyanan nga nangagi sa maong dapit, usa na niini si Raul Rocha, 42, nga taga Mabolo kinsa nagmaneho sa iyang Mitsubishi Adventure ug gilabay'g bato sa suspek.

Wala dayon kaharong ang mga polis nga sila si PO3 Jayme, PO3 Alejandro Laborte, PO1 Raymund Kiki ug PO1 Renato Noval Jr.gumikan sa nakitang gisukbit nga icepick sa hawak niini.

Samtang gikumbinsir pagtahan ni Jayme ang suspek magpunay usab kini og panglabay og bato kanila ug sa ilang patrol car hangtud nga midagan kini padulong sa Cebu International Port apan gigukod sa mga polis.

Nianang tungura kalit kining mibalik sa agi ug gibunot ang icepick dayong gukod kang Jayme hinungdan nga gipabuthan kini sa naulahi makausa diha sa bitiis ug gidisarmahan.

Daling gidala sa Cebu City Medical Center ang biktima ug gidiretso og balhin sa psychiatric ward sa Vicente Sotto Memorial Medical Center alang sa dugang pag-atiman.