Misuway'g ilog sa pusil napusilan

Napusilan ang usa ka 24-anyos nga lalaki dihang misuway kini sa pag-ilog sa pusil sa wala mailhing tulisan nga mitulis kaniya niadtong Biyernes sa buntag diha sa Barangay San Isidro dakbayan sa Talisay.

Mikabat sa P30 mil nga salapi ang nakuha sa suspetsado gikan sa biktima.

Si Reynaldo Destacamento, residente sa Canton village sa maong barangay nakaangkon og samad pinusilan sa walang bahin sa kilid sa iyang lawas daling gidala sa Talisay District Hospital apan gibalhin kini sa Cebu Community Hospital niining dakbayan.

Base sa imbestigasyon sa kapolisan sa Talisay nga si Destacamento nangihi diha daplin sa karsada kalit kining giduol sa suspetsado kinsa sakay og puwa nga motorsiklo dayon tion sa pusil niini ngadto sa biktima og miingon "tulis ni bay, itaas ang imong kamot".

Gikapkapan sa tulisan si Destacamento ug nakuha niini ang nahigsutang salapi nga gikan gi-withdraw sa biktima sa bangko.

Misuway sa pag-ilog sa pusil sa tulisan si Destacamento samtang nagkapkap kini sa iyang lawas apan gipusil hinoon siya sa suspetsado.