Napatay sa shootout mga terorista – PNP

Duha ka mga napatay sa "shootout" nga gituohang Muslim niadtong milabay'ng gabii diha sa North Reclamation Area gikompirmar nga mga sakop sa teroristang grupong Rajah Sulaiman Movement sumala pa sa mga kadagkuan sa kapolisan sa lalawigan.

Ang mga napatay mao sila si Ali Usop alyas Datu Ismael Usop nga duna usab laing alyas nga Alex ug kauban niining si Datu Niel Ulama alyas Viktor Zimenez human ang duha giingong kalit nga mirakrak sa misitang kapolisan human maalarma ang usa ka bomba sa entrance sa SM City Cebu.

Si Police Regional Office 7 director Eduardo Gador ug Deputy Regional Director for Operations chief Lani-O Nerez mikonpirmar niini sa mga sakop sa media kagahapon atol sa pakighinabi.

Matud pa ni Nerez nga ang duha kauban sa pito ngadto sa walo ka tawong gironda sa Criminal Investigation and Detection Group -National Capital Region pinanguluhan ni Supt. Leo Marzan sa Marikina niadtong Abril 27 diin nakuhaan kini og mga gamit ekplosibo nga gituohang gamiton sa pagpamomba sa Manila.

Ang duha giingong nanganhi sa Sugbo human sa maong ronda ug mianhi sa usa sa ilang mga kaubang dinhi na magbase sa Sugbo.

Si CIDG7 operations chief, Rex Derilo miangkon sa Banat News nga duna silay nadawat nga impormasyon dugay na kabahin sa posibleng grupo sa RSM nga gikan sa Marikina nga nia karon sa Sugbu, gani duna na silay mga hulagway niini ug karon tuyo nilang kumpirmahon ang personalidad.

Niadtong milabay'ng gabii, usa ka tawag sa telepono ang nadawat sa Mobile Patrol Group kabahin sa usa ka kadudahang plastic bag nga gibutang diha duol sa may 4th entrance gate sa maong department store nga gibilin.

Dihang gipangutana sa kapolisan ang gwardiyang si Bienvenido Bonan Jr. duha ka mga lalaking nagsuot og yellow nga polo shirt ug dark polo shirt nga nagkalo og bullcaps nga dark kolor ug nagsuot og maong pants ug pantalong faded ang mibilin niini.

Sa pagsusi sa MPG ug Special Weapons And Tactics (SWAT) sa karton sa sapatos diha sulod sa plastik mao ang duha ka M76 rifle grenades nga gisumpayan og detonating cord nga konektado sa usa ka electric blasting cap gipapilit og itom nga electrical tape ug may lighter canister sa butane, timing device, duha ka 9 volts battery, usa ka double A nga baterya ug uban pang gagmay'ng piyesa.

Diha na maabti ang duha sa dalan A. Soriano duol sa usa ka pribadong sam-ang sa nahisgutang lugar diin dihang gisitar sa grupo sa CIIB, Vice Control Section-DEU pinanguluhan ni Sr.Inspector George Ylanan, SWAT ug MPG gipaulanan hinuon sila og bala.

Ang sakyanan sa VCS-DEU nga Toyota Tamaraw FX naigo sa pinusilay diha sa windshield, ligid sa atubangan ug pultahan sa driver hinungdan sa pagbawos sa kapolisan.

Nakuha diha sa dapit diin magsangka, ang duha ka kalibre .45 nga Combat commander nga mga pistola, pitaka nga may sulod nga mga ID sa duha, mga basiyo sa kalibre .45 ug buhi nga bala, kwarta, basiyo sa M16, 9mm ug usa ka granada.

Matud pa ni Nerez nga duna pay laing kauban nga dinhi na magbase sa Sugbu ug karon ila pang gipangita, samtang iyang gitumbok nga responsable ang RSM sa pagpamomba niadtong Rizal Day bombing niadtong 2005 nga mipatay og upat ka tawo ug miangol og 60 pagpamomba sa Zamboanga, kalambigitan sa pagpamomba sa Superferry nga giangkon sa Abu Sayyaf Group sanglit ang duha ka grupo giingong kaalyado na.

"Kanang ilaha (RSM) dili lang gyud pagpanghulga kundili to kill people," asoy pang Nerez sa mga tigbalita kagahapon human pangutan-a sa media kung "dry-run" ra ba unta ang gihimo sa duha ka napatay.

Ang RSM gituohang natawo gumikan sa mga balikbayang Pinoy nga mga Kristiyanong nagpa-convert sa relihiyong Islam ug pag-uli dinhi mirekrut usab og laing mga Kristiyano ug nalambigit sila sa terorismo tungod usab sa giingong pagdawat nila og mga pundo gikan sa Middle East pinaagi sa usa ka grupong kun tan-awon ligal ang personalidad apan gidudahang konektado sa Al Qaedah Network.

Gipasanginlan sa gobiyerno ang lider sa RSM nga si Ahmad Santos nga nakig-alayon sa grupo ni Osama bin Ladin pinaagi sa bayaw sa naulahi nga nagpuyo sa Zamboanga nga konektado sa maong foundation.

Ang Sugbo nangandam na karon sa pagpahigpit sa seguridad alang sa umaabot nga panagtagbo sa 17 ka mga lider sa kanasurang sakop sa Association of South East Asian Nations (ASEAN) karong bulan sa Disyembre.