Tulisan giilogan og armas sa pasahero

Tulisan nailogan sa iyang armas, samtang biktima napusilan atol sa pag-inilogay sulod sa PUJ didto sa Wireless, Subangdaku Mandaue sa milabay'ng gabii.

Ang napusilan mao si Catalino Munin Jr., 25, ulitawo nga nagpuyo sa Katipunan, Labangon, Sugbo usa ka empleyado sa MEPZ II.

Matud pa ni Catalino nga samtang sakay siya sa PUJ gikan sa iyang trabaho, duha ka tawo ang katahapan og nilihokan hangtud sa pag-abot sa Wireless, Brgy. Subangdaku, dakbayan sa Mandaue mideklarar kini og tulis.

Samtang nagkalingaw og kolekta sa mga pasahero ang kauban niini ang suspetsado nagpadayon og tion kaniya sa kalibre 38 armas ug sa dihang nalipat si Catalino miilog sa armas sa suspetsado hinungdan nga nahitabo ang nilayogay sa duha sulod sa PUJ.

Usa ka buto ang nabati ug mao na lang nasayran ni Catalino nga naigo siya sa tuong tiil apan nailog usab niini ang armas sa suspetsado dayong ambak ug sibat sa maong PUJ.

Si Catalino gidala sa Chong Hua Hospital ug hinuon luwas na sa kuyaw nga kahimtang ug ang armas nga nakompiskar niini gi-turn-over ni Catalino ngadto sa kapolisan sa Station 2 sa MCPO.

Matud pa ni PO3 Dindo Montesclaros, imbestigador sa Station 2 nga padayon pa ang ilang gihimong imbestigasyon sa posibleng pag-ila sa mga suspetsado.