Indon police tabang na

Patay'ng giaswat sa duha ka Indonesians nga gidakop sa kapolisan dili Pinoy sukwahi sa ilang pangangkon, usa diay kini ka Indonesian national ug naabot sila dinhi gumikan sa giingong pagkalambigit nila pag -"seajack" sa usa ka barko gikan sa Indonesia nga ilang gidala dinhi sa Pilipinas sayo sa nakalabay'ng buwan sumala pa ni PRO-7 Director Eduardo Gador.

Sa nakuhang impormasyon sa mga sakop sa media gikumpirmar kini sa usa ka dakong opisyal sa Indonesia nga si Sr. Supt. Bambang Osadie kinsa maoy senior liaison officer sa nasud sa Indonesia diha sa Indonesian embassy sa kaulohan.

Mitumaw nga si Francisco Vidal ang giingong taga Tagum City nga namatay sa atake sa kasing-kasing giilang si Johannis Taruc nga taga Indonesia. Siya maoy sikretong gidala nila Bernard Labine ug Oscar Dalegi nga mga Indonesians usab apan nadakpan ug gitanggong sa kapolisan gumikan sa walay napakitang papeles.

Sumala pa sa maong report nga ang grupo nila Labine mibiya sa pantalan sa Sumatra niadtong Abril 13 sanglit gisugo silang ayuhon ang barko apan mipalawod sila ug wala na makit-i pag-usab, hangtud nga nabisto sila dinhi na sa Sugbu dihang giatake diha sa Guadalupe si Taruc alyas Francisco Vidal.

Adtong Mayo 2 nasigpatan ang mga barkong TB Silitonga nga gikapitanan ni Labine ug TK Santana V nga gikapitanan ni Dalegi diha na sa usa ka lugar sa Negros Oriental.

Si Cebu City Police director Melvin Gayotin sa pakighinabi sa Banat News kagahapon mikumpirmar nga mianha si Bambang sa ilang buhatan ug mitabang sa ilang imbestigasyon apan wala na mohatag og dugang pamahayag sa ubang detalye niini.

Apan mibutyag si Gayotin nga mahimong pasakaan og kaso ang mga langyaw gumikan sa pagsulod nila dinhi nga walay tukmang dokumentos.

Ang mga kaubanan sa tulo nga wala pa igkita sa kapolisan gipangita na karon apan ilang mga ngalan gipugngan sa Banat News samtang wala pa mapasakai og kasong iligal nga pagsulod dinhi sa Pilipinas.