Usa patay, onse angol

Usa ang patay ug onse ang naangol sa nahitabong aksidente sa kadalanan sa managlahing lugar sa miaging adlaw sa lalawigan sa Sugbo.

Ang unang insidente nahitabo dito sa National Hi-way Barangay Sangi Toledo City, samtang ang ikaduha didto sa Sitio Suba Barangay Sangat San Fernando Cebu.

Ang namatay giila mao si Michael Cabalse, 16, ulitawo nga taga Campo 10, Media Onse Toledo City, kinsa nalatayan sa ligid ang duha ka batiis niini sa usa ka minibus nga nagtangag sa plaka GWD 418, nga gipanag-iya ni Antonio Canonigo.

Base sa imbestigasyon sa kapulisan nga nag-atang ang biktima og kasakyan paingon sa Toledo, paghidangat sa maong mini bus, nipara kini, apan wala pa makatarong og hunong ang drayber, giingon nga nikapyot kini sa unang pultahan, apan wala makagunit pag-ayo hinungdan nga maayong pagkapasok ngadto sa ilawom nga bahin sa sakyanan.

Si Cabalse gisuwayan pagdala sa Toledo District Hospital, apan gidiklarar sa mga doktor nga patay na kini.

Samtang dose ka mga tinun-an sa nursing ang nalandig sa Carcar District Hospital, human ang ilang gisakyan nga L-300 Van misariling sa daplin ug didto napunta sa kanal, kinsa nipalyar ang manobela nga power steering nga gimaneho ni Junard Winnie Cabaluna, 23, ulitawo nga taga Sta. Lucia Bulacao Talisay.

Ang nangaangol giila sa kapulisan mao sila si Jonathan Palanca, 19, Lyle De Campo, Globert Navarro, 19, Ybonnie Vallego, 19, Cashmyre Beltran, pulos taga Barangay Lawaan Talisay, Flor Juesan, 24, Mitchell 19, Nely Violan, 18, nga taga minglanilla ug sila si Ybonnie Palang, 21, taga Naga, ug Iresh Remeticado, 20, San Fernando.

Matud ni SPO1 Joel Nebreja sa San Fernando Police Station nga nahinabi sa Banat News niingon nga gikan pa sa south ang maong sakyanan paingon na dinhi sa dakbayan sa s Sugbo, apan paghidangat sa maong dapit kalit lang niungot ang manubela, nga maoy nakaingon sa pagkasariling ngadto sa daplin sa kanal. Hinoon pangos ug bun-og lang ang naangkon sa onse ka mga tinun-an.