Ang nasikop mao si Jay Apas Bacosmo, 26, minyo nga lumolupyo sa Little Tokyo, Maguikay dakbayan sa Mandaue ug usa ka sakop sa Tau Gamma Phi.
Si Bacosmo nasikop pinaagi sa warrant of arrest nga giluwatan ni Mandaue RTC branch 28 Hon. Judge Marilyn Yap sa kasong murder ug two counts nga attempted murder nga giisyu ni Mandaue RTC branch 26 Hon. Judge Agustin Vestil ug walay piyansa nga girekomendar.
Atol sa gipahigayong liga sa basketball sa Banilad duol sa barangay hall dakbayan sa Mandaue nasigpatan ni SPO3 Ariston Batalona ug mga kaubanang pulis sa station 4 sa kapolisan sa Mandaue si Bacosmo ug pinaagi sa maong warrant of arrest kini gisikop ug gidala sa buhatan sa Station 4 sa MCPO.
Atol sa pagrekisa sa lawas ni Bacosmo nakuhaan pa gyud og duha ka sticks sa marijuana sa iyang posesyon hinungdan nga laing kaso na usab ang ipasaka batok ni Bacosmo.
Si Bacosmo maoy gitumbok nga maoy mipusil patay ni Mark Jude Montalban niadtong Marso 30 tuig 2003 sa kaadlawon ug miangol nila ni Lindio Tundag ug Ryan Paro human kini nagpaila nga mga sakop sa Tau Gamma apan wala tuho-i ni Bacosmo hinungdan nga iya kining gipamusil.