Pito ka armado sigpatan sa south

Pito ka armadong tawo ang nasigpatan sa Tubod, San Fernando usa ka bukirang barangay nga gibanabanang 14 ka kilometro ang gilay-on gikan sa Poblacion.

Usa ka magpapatigayon ang mitawag sa kapolisan sa miaging kaadlawon nga aduna siyay nakita nga pito ka armadong tawo nga miagi duol sa iyang panimalay ug wala kini magsubay sa dalan.

Duha sa pito ang armado og tag-as nga kalibre sa armas, ug ang lima niini walay dala, apan gituohan sa concerned citizen nga armado usab kini ug mga mugbo'g armas.

Human makadawat og tawag ang kapolisan mihimo gilayon og pagpatrolya sa maong dapit, apan napakyas kini gumikan kay wala na silay nakita sa maong lugar.

Ang hepe sa kapolisan ning lungsod nga si Sr. Insp. Ramon Ortiz nga nahinabi kagahapon sa Banat News, nagkanayon nga padayon ang ilang gihimong pagmonitor sa kabukiran nga dili na maagian og sakyanan.

Gihulagway ni Ortiz ang mga lugar diin kasagaran makadawat sila og mga tawag mao ang Liburon nga kasikbit usab sa Carcar, Sangi, ug ang Aneslag nga maoy utlanan sa San Fernando ug Pinamungajan.

Sumala pa niya nga aduna usab mga babaye nga kauban niining mga tawhana nga magsuroysuroy panahon sa lawom na nga kagabhion.

Midugang si Ortiz nga iya nang gihatagan ang tanang barangay kapitan sa tibuok lungsod lakip na mga tanod sa komunikasyon nga dali ra kaayo makapahibawo kanila kun ugaling adunay mga tawo nga kadudahan kaayo og linihukan.