47 lote sa AFP gitutokan

Gihatagan karon og pagtagad sa bag-ong hepe sa Central Command nga si General Samuel Bagasin ang problema sa 47 ka lote nga dunay gilapdong 80 ektarya diha sa Apas, Lahug niining dakbayan nga gidonar sa probinsiya sa Sugbo.

Ang 14 sa maong lote nga dunay gilapdong sobra 20 ektarya maoy giokupahan sa kampo sa militar ug ang sobrang luna giokupahan sa mga professional squatters.

Ang probinsiya sa Sugbo mipahigayon sa pagbawi niini aron magamit ang maong luna ug posibleng tukoran og komersiyo nga makahatag og dugang abot sa kagamhanan sa probinsya.

Si Bagasin nagplano nga ang maong problema ipaabot niya sa General Headquarter para mahatagan kini og kasulbaran.

Si Gobernador Gwendolyn Garcia nagkanayon kagahapon nga ang maong problema nagsugod panahon pa sa administrasyon sa iyang amahan nga si kanhi Gobernador Pablo Garcia ug hangtod karon wala gyud kini masulbad.

Niadtong Oktobre 12, 1959 adunay deed of donation ang kagamhanan sa probinsiya kabahin sa lote nga gilagdaan ni kanhi Gobernador Jose Briones nga nagkanayon kun ang maong lote gamiton gawas sa military purposes ma-revert o bawion kini sa probinsiya sa Sugbo.

Sa administrasyon ni kanhi Gobernador Vicente Dela Cerna aduna nay gipasar nga resolusyon ang board nga ma-revert ang nahisgutang lote tungod kay ang tibuok luna niini wala magamit sa military purposes.

Matud ni Garcia nga ang Cebu City nalambigit sa maong problema tungod sa Presidential Proclamation nga nagdeklara nga ang 32 ektaryang gilapdon sa luna gamiton sa urban poor housing apan ang kagamhanan sa probinsiya aduna nay gipahigayong manifestation aron supakon ang maong proyekto.