ABC mangayo'g opinyon sa CSC

Ang kadagkoan sa Association of Barangay Council (ABC) nagpakisayod karon sa baruganan sa Civil Service Commission kun ang ilang grupo maisip ba nga sanga sa kagamhanan.

Ang administrative officer sa ABC dinhi sa dakbayan sa Sugbo nga si Tessa Paradiang-Cang maoy mikuha og baruganan gikan ni CSC chairman Karina Constantino-David.

Si ABC vice president Sesinio Andales, kapitan sa barangay Pahina Central, namahayag nga kun ang labing dakong opisyal sa CSC mohatag og opinyon nga dili government office ang ABC, magamit nila kini sa depensa sa ilang kaso.

Si David daan na nga miluwat og opinion nga ang mga kawani sa ABC dili maisip nga kawani sa kagamhanan, ug nga ang ilang serbisyo sa maong kahugpungan sa mga barangay officials, dili nila malakip sa ilang government service record.

Apan usa ka abogado dinhi sa Sugbo nga si Atty. Alfonso dela Cerna wala makagusto sa opinion nga giluwatan ni David nga ang mga kawani sa ABC dili maisip nga kawani sa kagamhanan.

Si dela Cerna, abogado ni Engr. Leah Rondez, kanhi kawani sa ABC, nga mipasaka og kaso batok sa mga opisyal sa ABC tungod sa pagdumili paghatag kaniya sa iyang mga benepisyo isip kawani sa kagamhanan ug sa wala paghatag sa iyang fuel reimbursement.

Si Andales namahayag nga may lig-on na sila nga depensa sa kasong giatubang nila karon sa Sandiganbayan, kay isip dili kawani sa kagamhanan, si Rondez walay katungod sa pagpangayo sa maong mga benepisyo ug sa fuel reimbursement.