Petisyon gisang-at vs. Cha-Cha

Miduso kagahapon og petisyon batok sa gipahigayong signature verification para sa people's initiative nga mag-amendar sa Konstitusyon ang grupo sa Bayan Muna, Movement for Concern Citizens for Civil Liberties (MCCCL) ug ang grupo sa Integrated Bar of the Philippines (IBP) diha sa Regional Trial Court ug sa Court of Appeal.

Si Arman Perez Bayan Muna Secretary General nagkanayon kagahapon nga miduso sila og petisyon sa RTC batok sa gipahigayon nga signature verification sa Comelec para mahunong ang tinguha sa Malacañang pag-usab sa Konstitusyon.

Ang maong grupo diha miduso sa ilang reklamo sa RTC tungod kay ang maong ahensiya maoy dunay jurisdiction sa regional Comelec dinhi sa rehiyon ug sa ubang probinsiya sa Sugbo.

Gitataw ni Perez nga ang RTC maoy dunay jurisdiction sa pagpahunong sa signature verification.

Matud ni Perez kwestiyonon usab nila ang Department of Interior and Local Government (DILG) sa paggamit sa kwarta sa magbubuhis para sa ipahigayong signature verification.

Si Atty. Democrito Barcenas kanhi presidente sa IBP nagkanayon nga mihatag sila sa ilang suporta sa pagpahunong sa signature verification ug miduso usab sila sa ilang petisyon kagahapon sa Court of Appeal.

Ang mga miyembro sa IBP adunay tinguha sa pagpahunong sa administras-yong Arroyo sa gipahigayon niining signature verification. Matud ni Barcenas nga dili sila motugot nga mokuyanap ang diktadorya sa nasud.

Si Atty. Ben Militar kinsa maoy lead council sa giduso nga petisyon sa CA nagkanayon nga para sa Temporary Restraining Order (TRO) ug writ of preliminary injunction sa signature verification ang ilang petisyon.

Ang maong petisyon joint case nga giduso sa IBP Cebu City ug Cebu chapter. Gitataw ni Militar nga giduso nila sa CA ang ilang reklamo tungod kay ang Comelec maoy ahensiya nga respondent niini nga usa ka quasi judiciary agency ug ang maong petisyon usa ka original action sa prohibition ug certiorari.

Ang mga basehan sa IBP sa ilang reklamo mao nga walay "enabling law" nga magpahigayon og initiative.

Ikaduha mao nga ang initiative maka-proposed og amendar sa Konstitusyon apan dili pag-usab sa Konstitusyon.

Si Militar mipasangil nga ang people's inItiative dili kabubot-on sa katawhan kundili kabubot-on sa kagamhanan sa nasud.