Namaregla gitabanga'g dunggab sa 3, patay

Duha ka insidente sa pagpanunggab ang nahitabo sa Brgy. Guadalupe niadtong Domingo, usa kanila gipatay sa manag-amahan diin ang usa ka icepick gipatangag pa sa dughan sa biktimang maoy namaregla.

Diha sa Banawa, Guadalupe ning dakbayan usa ka Henry lcover, 38, minyo, usa ka construction worker ug molupyo sa Andres Abellana, Guadalupe ang gitabangan og dunggab nila ni Felipe Lopez, 60 anyos, ug mga anak nga sila si Romeo 26 ug Robert 22.

Giingong gisukmag sa biktima ang kutokuto ni Felipe sa walay igong hinungdan maong ang suspek mipauli apan pagbalik nagdala na og kutsilyo uban na ang duha ka mga anak.

Diha-diha gitabangan og dunggab sa tulo ang biktima nga wala na makapanapo sa kadaghan sa midunggab kaniya, patay na kini dihang nadangat sa Vicente Sotto Memorial Medical Center diin ang icepick nga wala nay puloan nagtaup pa sa dughan niini.

Si Felipe boluntaryo'ng misurender sa kapolisan apan ang duha ka mga anak niini daling nakaikyas.

Usa ka kutsilyo nga 9 ka pulgado ang gitas-on ug usa ka handle nga aduna'y mantsa sa dugo nga may gikatas-on nga 5 ka pulgada ang nasakmti nga mga ebidensiya sa kapolisan.

Sa laing bahin, diha sa Sitio Sandayong, sa samang barangay, si Reddin Sabal, 22, batan-on taga Sitio Lupa, brgy. Subangdaku, Cebu City ang gidunggab ni Bobit Ubod, batan-on ug naa sa legal na pangidaron, molupyo sa Lower Kalunasan, Cebu City ug usa ka wala mailhi nga suspetsado.

Si Sabal gikan sa diskohan apan samtang kini nagbarog-barog kilid sa dalan ug padulong na mouli kalit siyang giduol sa mga suspetsado ug gidunggab gamit ang usa ka mahait nga hinagiban diin naigo ang wala'ng bahin sa iyang lawas.

Ang mga suspetsado miikyas pagkahuman sa insidente samtang ang biktima gidala sa DVSMMC aron tambalan.