2 Indons kadudahan

Indonesian nationals nga nadakpan human makit-ing "sekretong" mikarga sa patay'ng lawas sa ilang kaubang Pinoy sakay sa usa ka kolor blue nga Tamaraw FX gidudahang mga sakop sa terorista.

Si Mayor Tomas Osmeña namahayag sa mga sakop sa media kagahapon nga kadudahan kaayong daling nangahanaw ang 12 ka mga kaubanan sa duha ka mga Indonesians nga sila si Oscar Dalegi ug Bernard Lebene.

Ang duha gidakop human wala makapakita og dokumento sama sa passport ug rason sa ilang pag-anhi dinhi sa Sugbo ug ingon man sa kapakyas nila pagpahibalo sa kapolisan kabahin sa nahitabong kamatayon sa ilang kaubang Pinoy nga si Francisco Cañada Vidal nga giingong taga Tagum City Davao del Norte.

Nagduda si Mayor Osmeña nga kun wala pay dautang katuyoan ang maong mga langyaw ipahibalo unta nila sa awtoridad ang nahitabo sa ilang kauban samtang sila nagpundo diha sa Annex Crown Regency Hotel sa barangay Guadalupe, imbes nga ipahibalo ang hitabo pasikreto pang giaswat sa duha ang pinutos nga lawas ni Vidal sakay sa usa ka sakyanan.

"If you had a heart attack, you won't run away. You'll call a doctor," matud pa sa mayor.

Samtang kabahin usab sa turismo gihulagway sa mayor nga 'out of pattern' ang pag-anhi sa mga Indonesians sanglit ang kusog nga mga turista dinhi gikan sa China ug Amerika lakip na ang mga Koreano.

Usa sa nakapaduda sa mayor mao ang giingong nadawat nga tawag sa telepono sa usa ka abogado dinhi nga gikan usab sa usa ka abogado sa Davao, apan ang maong abogado nga taga Cebu mikonsulta sa abogadong konsehal na karon sa dakbayan kung unsaon pagkuha ang patay'ng lawas.

"In a very short span of time, there already legal support... in other words, they have friends, networking," asoy pang Osmeña.

Dako ang pagtuo sa mayor ang Señor Sto. Niño miluwas sa dakbayan sa posibleng dautang katuyoan sa mga langyaw dihang giatake sa kasing-kasing ang kauban sa mga Indonesian.

Sa laing bahin, si CIIB chief Pablo Labra kinsa maoy miimbestigar sa mga Indonesians nagkanayon nga ila rang buhian ang duha kun makapresentar kini og mga dokumentos ug mahibaw-an ang ilang katuyoan dinhi.

Ingon man kun masutang walay foul play ang kamatayon sa ilang kaubang Pinoy, apan kung masutang gipatay ang biktima pasakaan og kasong murder ang duha ka Indonesians.

Gisusi na sa CIIB pinaagi sa pagtawag sa Jakarta, Indonesia ang pagkatawo sa mga langyaw kung dili ba kini mga terorista.

Ang Indonesia maoy dapit nga gituuhan diin matawo ang grupong Jemaah Islamiyah.

Ning tuiga ang lalawigan sa Sugbu naghinay-hinay na og pahugot sa seguridad nunot niining umaabot nga ASEAN Summit karong Disyembre diin 17 ka mga lider sa ubang mga nasud lakip na ang Estados Unidos motambong.

Nanawagan karon ang kapolisan sa mga Sugboanon sa pag-ikmat sa ilang palibot ilabi na sa mga kadudahang mga langyaw nga posibleng molusad og teroristang pagpangatake.