2 INDONS NAGYAYONG OG PATAY

Duha ka mga Indonesian ang nakit-ang dunay giyayungang patayng tawo paggawas sa usa ka hotel diha sa dalan V. Rama, Guadalupe ning dakbayan niadtong milabay'ng Sabado sa hapon.

Ang mga langyaw giilang sila si Oscar Dalegi ug Bernard Lebene, pulos hingkod ang panuigon, kinsa gidakop sa kapolisan human wala dayon makapakita og mga papeles ug passport ug sa rason sa ilang pagpundo dinhi.

Ang patayng lawas nga ilang gisakwat giila nilang si Francisco Cañada Vidal, 55, biyudo ug lumad nga taga Tagum City, Davao del Norte ug kasamtangang nagpuyo diha sa nahisgutang hotel.

Sa imbestigasyon sa Homicide Section migawas nga dunay mga kawani sa maong hotel nga nakakita sa pagyayong sa mga langyaw sa usa ka patayng lawas nga giputos og kolor puti nga panapton ug gikarga sa usa ka kolor blue nga Tamaraw FX ug gidala sa wala matinong lugar.

Daling gipahibalo sa mga kawani ang kapolisan hangtud nga nadiskubrehang gidala sa mga langyaw ang patay'ng lawas ni Vidal sa Cebu Memorial Funeral Homes sa dalan Tres de Abril.

Ang mga langyaw mipaila nga ilang kauban si Vidal ug maong ila kining gisakwat ug gidala sa punerarya gumikan usab sa mando sa ig-agaw sa biktima.

Inubanan sa mga kawani sa hotel, barangay kapitan Eugenio Faelnar ug ang mga langyaw gisubay nila ang mga lawak nga giukopar sa biktima ug mga langyaw diha sa room 202, 205 ug 206.

Sa pagsusi sa kapolisan sa lawas ni Vidal walay nakitang foul play diha sa gawas apan gikatakdang ipa-awtopsiya ang patayng lawas niini aron matino kun unsay hinungdan sa kamatayon sa biktima.

Gisusi na karon sa Criminal Investigation and Intelligence Branch kun unsay tuyo sa mga langyaw dinhi ug ingon man ang pangangkong kauban ra nila ang patayng lalaki.

Si SPO2 Rey Cuyos usa sa mga imbestigador sa Homicide Section mitug-an sa Banat News nga naglisod sila pag-imbestigar sa mga langyaw gumikan kay dili kini makamaong mosulti og iningles.

Samtang giangkon ni Cuyos nga dili sila kumbinsido kung tinuod ang pangalang gihatag sa mga Indonesian lakip na ang pangalan sa patayng tawo gumikan kay ang gipangangkong ig-agaw sa biktima wala na maabti sa kapolisan diha sa gidad-ang punerarya.

Ang lalawigan sa Sugbu, samtang nagkaanam og kaduol ang umaabot nga ASEAN Summit karong Disyembre gihugtan usab ang seguridad nunot sa gipanglantawang pagpangatake sa mga gidudahang teroristang Jemaah Islamiyah.

Ang Jemaah Islamiyah nagbase sa Indonesia ug milusad na kini og pagpamomba sa Bali makaduha ka higayon ug pipila ka mga insidente sa pagpamomba diha sa Mindanao gipasangil usab nga duna silay kalambigitan.