2 lalaki napusilan sa managlahing lugar sa north

Duha ka mga lalaki gipusil sa managlahing lugar dinhi sa amihanang bahin sa lalawigan sa Sugbo, usa niini anaa pa sa kritikal nga kahimtang sulod sa tambalanan, ang usa gikataho nga luwas na hinuon sa peligro.

Ang unang insidente nahitabo sa dalan P. Rodriguez, Bogo alas 11:45 ang takna niadtong Biyernes sa gabii.

Ang biktima giila nga mao si Leodegario Velazquez Jr., 32, ulitawo, taga Dayhagon Medillin, ang mipusil sa biktima mao si Geovanni Cañete, hingkod ang pangidaron, usa ka security guard sa Prime Asia sa maong lugar.

Si Velasquez nakaangkon og samad pinusilan sa iyang ulo ginamit ang wala pa matino nga kalibre sa armas.

Ang biktima gidala sa Bogo District Hospital, pero gibalhin ra dayon sa usa ka tambalanan dinhi sa dakbayan sa Sugbo. Samtang ang suspek pabilin nga gawasnon human daling misibat palayo sa maong lugar.

Ang ikaduhang biktima mao si Daniel Ramos Giangan, Jr. 16 anyos, nagpuyo sa dalan F. Ralota Poblacion, Danao nakaangkon og samad pinusilan sa tuong paa.

Base sa imbestigasyon ni PO3 Glenn Manucat nasayran nga samtang naglingkod ang biktima diha sa gutter sa maong lugar uban sa iyang amiga, kalit lang mibutho ang upat ka mga lalaki, dayong pusil ngadto sa biktima.