2 tawo nakuryente, 1 kanila namatay

Duha ka tawo ang nakuryentihan usa niini ang patay ug ang usa nakaangkon og paso sa lawas, niadtong Miyerkules ug Biyernes sa duha ka lugar sa habagatan ug amihanang bahin sa Sugbo.



Ang unang insidente nahitabo alas 11 sa buntag diha sa Canbanua, Argao.

Si Pablo Dayaganon, 33, residente sa maong lugar patay na nga nadangat diha sa Isidro Kintanar Memorial Hospital.

Si PO1 Eduardo Semilla polis sa Argao mibutyag kagahapon sa Banat News nga ang nahisgutang insidente nahitabo diha sa balay ni Dayaganon dihang nag-ayo kini sa plug sa iyang microphone gamit ang soldering gun.

Mi-ground ang maong soldering gun nga gamiton unta ni Dayaganon sa pagsulda sa microphone ug mikuryente sa biktima ug gituhoan nga maoy hinungdan sa kamatayon niini.

Sa laing bahin, nakaangkon og paso sa lawas ang usa ka 26-anyos nga mananagat human kini makuryente samtang nanagat niadtong Biyernes sa gabii diha sa Sityo Libon, Guinsay, Danao.

Si Genaro Lato, residente sa maong lugar, daling gidala sa Danao District Hospital apan tungod sa kahimtang niini gibalhin sa Vicente Sotto Memorial Medical Center niining dakbayan.

Gibutyag kagahapon sa Banat News ni SPO1 Jose Relampagos polis sa Danao nga si Lato nangisda diha sa maong lugar gamit ang electric wire nga gi-connect sa makina sa iyang pumpboat.

Matud ni Relampagos nga posibleng manguryente og isda si Lato apan naunay hinoon kini.