Ang maong balaod gipatumang higpit sugod niadtong Mayo 1, sa barangay Basdiot, Saavedra ug Tubli, aron pagpitol sa mga batan-on gikan sa gawasnong pagsuroysuroy niini sa kadalanan bisan lawom nang gabii.
Matud pa ni SPO2 Jose Tacoloy, desk officer sa Moalboal Police Station nga matag alas 10:00 sa gabii hangtod sa alas 4:00 sa kaadlawon mipatigayon silag pagpatrolya sa mga nagkalainlaing suok sa lungsod.
Kini aron sa pagtino nga ang mga kabataan anaa na sa ilang mga panimalay ug namahuway sa kagabhion.
Matud pa ni Tacoloy nga ang maong balaod sa curfew dugay nang gipaimplementar sa lungsod, apan tungod kay malinawon man kaniadto, dili kaayo higpit ang pagpatuman niini.
Apan sukad madiskobre ang lawas patay sa usa ka 18 anyos nga dalaga niadtong kabuntagon sa Abril 30,2006 nga gitambog sa usa ka bito sa barangay Basdiot, napugos si Mayor Inocentes Cabaron pagpatumang estrikto sa curfew.
Matud pa ni Tacoloy nga hangtod karon wa pa masulbad ang kamatayon ni Jovelyn Maano Y Avenido, 18, dalaga nga taga Basdiot.
Ang lawas patay sa biktima nga giingong gipusposan og bato ug gitambog sa bito, napalgan sa usa ka mag-uuma nga si Alexander Pableo, 31, minyo niadtong Abril 30.
Nasayran nga nanguha og kumpay sa baka si Pableo dihang ang kabaho sa lungag kon bito nga may dos metros ang giladmon maoy nakapadani kaniya pagsil-ing kon unsay nabaho didto.
Dihang nakita niya ang lawas patay sa usa ka babaye, iya dayon kining gitaho sa kapolisan.
Matud pa ni Tacoloy nga may duha o tulo na ka semana malagmit ang maong lawas patay ug talibungkag na kini gumikan sa pagkadugta, ug dihang gi-awtopsihan, may samad ang ulo.