Ugangan gitigbas sa iyang umagad

Kritikal ang kahimtang sa usa ka ugangan human kini tigbasa sa iyang umagad didto sa Sitio Calachuchi, Cambiohan, Consolacion kagahapon sa kaadlawon.

Ang biktima mao si Leonides Catipay ug lumolupyo sa maong dapit. Ang mitigbas mao ang iyang umagad nga si Gerson Pitogo, 28, minyo nga silingan ra usab sa biktima.

Base sa imbestigasyon ni SPO2 Pedrito Caburnay sa Consolacion Police Station nasayran nga mga 12:30 kagahapon sa kaadlawon samtang natulog si Gerson nakurat kini sa dihang gipukaw siya sa iyang ugangan.

Atol sa ilang panag-estorya gibugal-bugalan ni Leonides si Gerson hinungdan nga mikuha og kutsilyo si Gerson aron sa paghudlat sa iyang ugangan, apan wala mahadlok niini si Leonides ug nagpadayon sa iyang pagbugalbugal.

Gumikan sa kalagot ni Gerson mikuha kini og pinute og dayong tigbas ngadto sa iyang ugangan hinungdan sa pagkahiagum niini og samad sa likod ni Leonides.

Si Leonides gidali pagdala sa Eversly Hospital samtang si Gerson mitahan sa iyang kaugalingon ngadto sa kapolisan sa Consolacion ug andam kining manubag sa iyang nahimong salaud.