Tom nakahukom sa Busay i-'award' ang Marco Polo

Nakahukom si mayor Tomas Osmeña nga itugyan na lang ngadto sa Barangay Busay ang katungod nga makakolekta sa buhis sa bag-o lang gibuksan nga Marco Polo Plaza Hotel sa may Nivel Hills Lahug.

Atol sa press conference kagahapon sa udto nahukman ni Osmeña nga adto itugyan sa Busay ang gikabangiang luna tali sa Apas ug Lahug sukwahi sa nahauna niyang pamahayag nga itugyan ngadto sa Apas.

Apan daling gipasabot sa mayor nga nakahunahuna siya nga adto itugyan sa Busay ang maong gikasungian nga boundary gumikan kay mas duol kini sa nahisgutang barangay kun itandi sa Apas ug Lahug.

Tungod niini mas pabor sa Busay ni Kapitan Eleodoro "Yodi" Sanchez ang pagpa-angay sa mga gikinahanglang basic services sa maong hotel matag adlaw itandi sa maong duha ka mga barangay.

Gawas niini mas sayon og dali ra usab ang pagresponde sa Busay kun dunay mga motumaw nga problema ug panginahanglan sa maong establisamento.