Mamumuo gipasidunggan

Gipasidunggan ni Mayor Socrates Fernandez ang mga mamumuo tungod sa kadako sa natampo niini sa natad sa ekonomiya sa nasud.

Alang kang Fernandez, ang mga mamumuo maoy dugokan nga naghatag og kalig-on sa ekonomiya sa nasud.

Samtang ang Metro Cebu mitukod sa gitawag nga Metro Cebu Tripartite Industrial Peace Council (MCTIPC) nga ginsakpan sa mga siyudad sa Lapu-Lapu, Mandaue, Cebu ug Talisay.

Ang matag mayor sa maong mga siyudad maoy tsirman sa grupo nga MCTIPC sa ilang tagsatagsa ka lugar.

Gipasabot ni Fernandez nga ang kamalinawon sa pamuo mag-agad usab sa maayong relasyon sa mga mamumuo, tagdumala ug sa gobiyerno nga nagdumala kanila.

Kon niining tulo may dili makatuman sa iyang responsibilidad ngadto sa usag-usa nga iyang kauban, anha magsugod ang kagubot ug dili pagsinabtanay.

Maoy hinungdan nga alang kang Fernandez dako kaayo og mahimo ang pagsinabtanay tali sa mga mamumuo ug sa tagdumala.

Kay pinaagi niini dili usab kaayo labad ang ulo sa sektor sa gobiyerno nga maoy tigpataliwala kanunay ug tigpatuman sa balaod bahin sa pamuo.

Si Fernandez nga maoy tsirman sa MCTIPC diha sa Talisay City nagkanayon nga trabaho alang sa Talisaynon maoy iyang hatagan og pagtagad.