Bise mayor sa Naga mi-hurar

Si kanhi Konsehal Delfin Señor mao nay Bise mayor sa lungsod sa Naga sugod niining buwana human kini mihurar niadtong Sabado. Si kanhi Bise mayor Valdemar Chiong nga mao nay mayor sa lungsod ang nagpahurar ni Señor kinsa kanhi maoy unang konsehal sa Naga.

Si Señor maoy tsirman sa komitiba sa inprastraktura ug ika-tulong termino na niya karon sa iyang pagka-konsehal sa lungsod. Ang maong kalihokan gipahigayon diha sa munisipyo sa Naga ug gitambongan kini sa mga opisyal sa lungsod ug sa kabarangayan.

Atol sa maong kalihokan si Chiong misaad sa mga opisyal sa mga barangay sa Naga nga ipadayon niya ang nasugdan na nga kalihokan sa iyang maguwang nga si kanhi Mayor Ferdinand Chiong para sa kaayohan sa mga lumulupyo sa kabarangayan.

Si Señor misaad ngadto ni Chiong sa iyang suporta sa mga kalihokan niini para sa kaayohan sa mga lumulupyo sa Naga.

Kahinumduman si Valdemar maoy mipuli sa pwesto ni kanhi Mayor Ferdinand human kini mitaliwan ngadto sa laing kalibutan sa milabayng buwan tungod sa sakit nga cancer.