3 grupo sa mga raliyista nag-ilog sa puwesto

Gihulagway ni Cebu City Police Office director, Supt. Melvin Gayotin nga malinawon gawas lang sa pipila ka ginagmay'ng wala pagkasinabtanay sa mga grupong mipahigayon og rally atol sa pagsaulog kagahapon sa adlaw sa mga mamumuo.

Dunay gipakatap nga duha ka batalyon mga sakop sa kapolisan ug Central Command kagahapon nga misiguro sa seguridad samtang nag-rally ang mga grupong Bayan, Kilusang Mayo Uno, Sanlakas, Buklurang Manggagawang Pilipino, Laban ng Masa, Anakpawis ug Nagkahiusang Drayber sa Sugbo (NADSU).

Si Gayotin mitug-an sa Banat News nga dunay mitumaw nga wala pagkasinabtanay sa grupo sa mga raliyista kagahapon gumikan sa panag-ilog sa pwesto diha sa atubangan sa usa ka dakong department store nga sagad nang himuong sentro sa mga rally diha sa dalan Colon.

Ang grupo ni Winnie Badayos sa Kilusang Mayo Uno ug Bayan Muna mireklamong giunhan sila sa pwesto sa grupo sa Sanlakas pinanguluhan sa grupo nila ni Aron Pedrosa .

Gilalisan sa grupo ang nakabutang sa ilang mga permit diin sila magpahiluna atol nianang adlawa apan wala masunod ang mga nalatid sa ilang mga permit hinungdan sa pagtumaw sa gamay'ng panagtrokis sa duha ka grupo.

Hinuon ang grupo ni Badayos adto na lang mipadayon sa ilang pag-rally sa eskina Legaspi ug Colon usa ka bloke gikan sa gikahimutangan sa Sanlakas.

Si Gayotin sa iyang bahin nagkanayon nga buot na unta niyang mointerbiner apan wala niya kini buhata bisan sa nakitang panag-initay sa duha ka grupo gumikan kay gidili sa balaod nga dunay polis o ba kaha militar nga mosagol diha sa mga rally.