Gi-salvage nabuhi

Usa ka 27-anyos nga lalaki gihulog sa bung-aw sa Tan-awan Guadalupe, Carcar human kini gitulis, gibun-og ug gisamad-samaran sa tulo ka wala mailhing lalaki niadtong Huwebes sa kadlawon.

Si Larry Berdon quality auditor sa Macato Metal Technology nga nagbase sa dakbayan sa Lapu-Lapu napalgan nga nagbitay sa gamot sa kahoy diha sa bung-aw nga walay panimuot sa usa ka babaye.

Si Berdon nakaangkon og mga bun-og ug mga samad sa lawas tungod kay gitabangan kini og kulata ug gihiwa-hiwa pa gyud sa mga suspetsado ang lawas sa biktima.

Si SPO1 Roland Navales, polis sa Carcar mibutyag kagahapon sa Banat News nga si Berdon gikan mitan-aw sa pasundayag sa "Kadaugan sa Mactan" naglakaw kini paingon na nga mopauli mga ala una sa kadlawon niadtong Huwebes.

Tulo ka wala mailhing lalaki kinsa sakay og usa ka kotse ang mihagad ni Berdon nga mosakay sa nahisgutang sakyanan apan ang biktima nagdumili sa pagsakay tungod kay wala siya makaila sa maong mga lalaki.

Matud ni Navales nga tungod sa pagbalibad ni Berdon gitabangan kini ug bunlot sa nahisgutang mga lalaki og gipugos sa pagpasakay sa kotse.

Diha sa sulod sa maong kotse nawagtangan sa panimuot si Berdon tungod kay gitabangan kini og kulata ug gisamad-samaran pa gyud sa mga suspetsado gamit ang buak nga botilya.

Pagkamatngon ni Berdon sa iyang panimuot wala na ang iyang salapi nga P2,700 ug cellphone ug pagkaabot sa nahisgutang bung-aw gipagawas si Berdon sa mga suspetsado gikan sa sakyanan ug gitukmod.

Si Navales nagkanayon nga usa ka babaye nga nangahoy diha sa lugar ang nakabangal ni Berdon niadtong Biyernes.

Si Navales midungag nga si Berdon gipasakay ug gihatod sa Barili police station ni SPO1 Benjamin Delfin polis sa Moalboal kinsa gikan mitambong og court hearing sa Kapitolyo og naatol nga milabay diha sa lugar nga gihagbungan sa biktima mga alas 2:00 sa hapon niadtong Biyernes.

Ang kapolisan sa Barili maoy mitawag sa mga paryente ni Berdon og gi-refer kini nga diha magpa-blotter sa kapolisan sa Carcar.