Italyana patay na mihuot sa lungag

Usa ka babayeng Italian national napalgang patay nga mihuot sa lungag may giladmon nga dos ngadto sa tres metros didto sa Sitio Panagsama, Basdiot, Moalboal kagahapon sa alas 3 sa hapon.

Gituohan sa kapolisan sa Moalboal nga mosobra na sa usa ka semana nga didto sa lungag ang Italyana tungod kay nagkaanam na og kadugta ang lawas niini lakip na ang nawong nga halos dili na maila ug hilabihan nang bahua.

Sa nasayran sa Banat News nga dugay nang nanimuyo sa maong dapit ang Italyana ug gani duna na kini dakong balay nga gipanag-iya niini ug sa iyang bana nga usa usab ka Italyano.

Wala pa masayod ang kapolisan ning lungsod kun gipatay ba o nahagbong lang ang maong Italyana nga gibanabana sa kapolisan nga nagpangidaron og 40 ngadto sa 50 anyos.

Si PO2 Teodolo Baya sa Moalboal Police Station sakop sa Alert Team nga base sa ilang nakuha nga mga pamahayag sa mga silingan nag-away-away kini sa iyang bana sa miaging semana.

Gani diha pay nakakita nga giguyod sa iyang bana paingon ngadto sa ilang panimalay ang maong Italyana.

Ang sakop sa Scene of the Crime Operatives sa Cebu City Police Office mituyo og adto sa Moalboal ug maabag sa kapolisan pag hiling sa patay'ng lawas niini.

Sumala ni PO2 Baya nga gipangitaan gyud og paagi sa mga sakop sa SOCO ilang gibutangan og paint tinner ang maong lungag kay dili sila kaagwanta sa baho.

Gihulagway ni PO2 Baya nga gamay ra ang lungag sa ibabaw nga bahin nga igo kaayo nga masulod ang lawas, samtang ang ilawom dako na og wanang.

Matud pa ni PO2 Baya nga ang maong lungag gitawag kini sa lumolupyo og "Vito" nga wala tuyoa og bangag kun dili mitungha lang og iya daw sa kinaiyaan sa usa ka matang sa lugar nga medyo batuon.

Apan sa follow up nga gihimo sa Banat News, si PO2 Baya nagkanayon na nga dili diay Italyana ang maong babaye sumala sa una nilang nasayran.

Sumala pa niya nga iya sa usa ka dalagang Pilipina nga gibanabanang nagpangidaron og 17 ngadto sa 18 anyos ug gituohang sakop sa Alpha Kappa Rho tungod sa pulseras nga nakit-an niining may sinyal sa maong fraternity.