Dala sa maong mga polis ang search warrant nga giluwatan ni Judge Geraldine Faith Econg sa Regional Trial Court branch 9 atol sa gipahigayon nilang pagpangronda.
Ang mga nasikop mao si Rudy Marayan ug Eva Abellana Tañajora pulos hingkod ang panuigon ug mga residente sa maong lugar.
Ang inahan ni Tañajora nga si Feditha Abellana kinsa lakip sa search warrant nakaikyas atol sa maong pagpangronda.
Ang mga awtoridad nakasakmit og upat ka paketeng shabu gikan sa mga suspetsado duha niini gikan ni Tañajora, usa gikan ni Marayan ug ang usa gikan sa balay ni Abellana kinsa natulog diha sa laing balay atol sa pagpangronda sa mga polis.
Ang suspetsado gidala kagahapon sa buntag diha sa Cebu Provincial Polis Office.
Gikataho nga ang tulo mga drug personality diha sa barangay Pasil ug mibalhin kini sa dakbayan ug nalakip ang tulo sa watch list sa kapolisan.
Gibutyag kagahapon ni Supt. Herman Lungayan Jr., hepe sa Paid-Soft nga adunay nahitabong panaglalis tali sa kapolisan nga mipahigayon sa pagpangronda ug sa babayeng silingan ni Marayan tungod kay wala kini motugot nga dalhon sa mga polis ang $8,000 (P416,000) kun pailisan kini sa peso nga salapi nga gituhoang halin sa drugas.
Matud ni Lungayan nga ang maong babaye miboluntaryong mosaksi sa ilang gipahigayong pagpangronda bisan aduna nay duha ka tanod nga misaksi.
Si Lungayan midungag nga ang maong babaye maoy naghupot sa nahisgutang salapi.
Ang mga suspetsado nagdumili kagahapon sa pagpa-interview sa mga tigbalita aron makuhaan unta sila og pamahayag.