Lumad Basakanon no. 1 sa Aliwan fest sa Manila

Bisan sa mga mitumaw nga problema ilabi na sa pundo alang sa konsumo ug uban pa, wala mapakyas ang mga Sugboanon sa pagpakita sa ilang labing maayong presentasyon atubangan sa linibong mga tumatan-aw sa Aliwan Festival 2006 sa Quirino Grandstand hangtud sa Cultural Center of the Philippines Complex sa Manila niadtong Sabado sa gabii.

Ang Aliwan Festival maoy gibansagang "Mother of all festivals" dinhi sa nasud diin ang mga mosalmot nagrepresentar sa matag rehiyon, lalawigan ug probinsya gikan sa tibuok nasud.

Ang grupong "Lumad Basakanon" nga giisip sa mga taga Manila nga "newcomer" sa maong kumbate maoy gipadala sa dakbayan sa Sugbu pinaagi sa Sinulog Foundation ug mao hinuoy misakmit sa first runner up nga puwesto lakip na ang P1 milyon nga premyo.

Si kanhi konsehal George Rama ang pangulo sa "Lumad Basakanon" atol sa interbyu sa mga tigbalita mibutyag nga sila maoy labing gikahinaman sa mga taga Manila nga masaksihan inig presentar sa ilang sayaw ug ritwal.

Tuod man matud pa ni Rama bisan sila maoy katapusang mipresentar sa 28 ka mga contingents gikan sa nagkadaiyang rehiyon sa nasud, ang Sugbo gipaabot gyud sa mga tumatan-aw.

Atol sa pagsugod sa presentasyon matud pa ni Rama nga naghugyaw na ang mga tawo hangtud nga natapos ang sayaw ug ritwal, ang talagsaong interpretasyon ug sayaw inubanan sa gamayng ritwal matud pa sa kanhi konsehal maoy nakapalahi sa mga Sugboanon kumparar sa ubang mga contingents nga matud pa ni Rama nagsalig ra sa mga props nga daw mga miyembro sa "circus."

Mapasalamaton si Rama sa mga pribadong tawo nga mitabang sa ilang problema sa konsumo nga mao untay diriyot nakaingon nga wala sila mahinayon pagbiya niadtong Abril 26.

Ang galastuhan sa grupo giabaga sa Sinulog Foundation, Cebu City Hall ug mga pribadong mga tawo.

Ang grupo dunay 170 ka mga tawo nga gilangkuban sa mga sumasayaw, props men, drums and bugle, driver, kusinera, choreographers ug pipila ka mga opisyal.

Ang choreographers mao ang magsuong Dennis Navarro ug Norman Navarro nga mao usab ang ilang choreographers sa dugay na nga panahon atol sa pagsalmot sa Sinulog Festival matag tuig.

Si Mayor Tomas Osmeña mipahibalong iyang awhagon ang konseho sa pagpanday og resolusyong modeklarar sa Lumad Basakanon sa barangay Basak nga Official Dance Troupe sa dakbayan.

Kun mahitabo kini ang maong grupo na ang morepresentar sa Sinulog Festival ug ubang mga kalihukan nga mahisgut og kultura.