Mga sikyu gitinguha pahawaon

Kapin sa usa ka libo ka mga lumolupyo sa tulo ka mga barangay sa lungsod sa Moalboal mipirma og dokumento ug gipadangat sa buhatan sa mayor ning lungsod nag-awhag sa pagpapahawa sa mga security guards nga nagbantay sa ilang yuta.

Ang kahugpongan sa BATUSAFFA kun Basdiot, Tuble, Saavedra Farmers and Fisherman's Association ingon man ang duha ka mga barangay kapitan sa Moalboal miawhag sa dinaliang pagpahawa sa mga guwardya nga nagbantay sa mga luna sa yuta nga giingong gipanag-iya sa Tri-Island Holdings Corporation.

Ang mga luna nasakop sa tulo ka mga barangay sa Tri-Island Corporation.

Ang BATUSAFFA nakahipos og 354 pirma sa mga lumolupyo sa Saavedra samtang ang Tuble adunay 340, ug 355 usab ang nakuha sa Basdiot.

Ang BATUSAFFA miawhag ni Mayor Inocentes Cabaron sa Moalboal nga mohimo og lakang aron sa ingon masulbad ang dugay na nga panagbangi tali sa mga lumolupyo sa tulo ka mga barangay ug sa Tri-Island Holdings Corporation nga miresulta sa duguon ug mikalas na usab og mga kinabuhi.