Mini nga tiket sa Badboy tour

Ang gikagubtang "badboy tour" sa National Basketball Association (NBA) legend nga si Dennis Rodman sa miaging gabii sa Mandaue City Sports and Cultural complex gipabahaan og mga mini nga tiket.

Kini nunot sa pagkasikop sa duha ka mga tawo nga namaligya og peke nga ticket nga ang P500 ang gibaligya na lamang og P200 ang kantidad.

Ang nadakpan mao si Ferdinand Torricampo, 40 anyos, minyo nga taga dalan 236 C. Padilla ug Augosto Vinallon, 58 anyos,minyo nga taga T. Padilla Extention sa Villagonzalo, sa dakbayan sa Sugbo.

Si Cristopher Dy nga maoy security guard ug badboy tour coordinator maoy unang nakadiskubre sa pagsulod sa mini nga mga tiket dihang midagsang ang mga tawo nga misulod sa sports complex.

Ang gitudlo ni Sr. Supt. Eduardo Catabas nga si Sr. Insp. Abrahan Ocampo nga nakadawat sa maong reklamo mihimo gilayon sa pagdakop sa duha ka suspetsado ug nasakmit nila ang mga ebidensiya nga mini nga mga tiket.

Ang duha ka dinakpan nga gitanggong karon sulod sa bilanggoan pasakaan og kaso sa mga nagpasiugda sa maong dula sa NBA human usab maandam ang mga ebidensiya ug dokumento.