Monitoring sa overload nga sakyanan suportado

Suportado sa mga lokal nga opisyal sa dakbayan sa Sugbo ang programang gipatuman sa Department of Transportation and Communication (DOTC) nga gitumong aron pagmonitor ug pagbadlong niadtong mga sakyanan nga mag-overloading.

Ang tsirman sa committee on laws sa konseho sa dakbayan Konsehal Eduardo Labella mopalabang og resolusyon atol sa sesyon sunod semana aron ipadayag ang suporta niini sa "Road Board Program" nga gilusad sa DOTC.

Gibasehan niining maong programa mao ang Akta Republika 8794 nga gitawag og Anti-Overloading Law.

Ang maong balaod nagmonitor ug naggiya alang sa maayong epekto ug aron makabenepisyo ang tanang mga motorista dinhi sa nasud nga malayo sa bisan unsa nga aksidente.

Sigun sa rekord sa National Center for Transportation Studies (NCTS) nagpakita nga moabot og 970,000 ang mga nahitabong aksidente sa kadalanan matag tuig diin ang 120,000 niini naggikan sa mga sakyanan nga mag-overloading sa mga kargamento.

Gawas sa aksidente gihulagway sa susamang pagtuon nga ang mga sakyanan nga mag-overloading usa usab kini sa hinungdan nga dali ra nga maguba ang mga kadalanan ug dugang gasto sa maintenance niini.

Ubos ning maong programa awhagon ang mga motorista nga mosunod sa mga hustong proseso ug pamaagi sa pagmaneho og mga sakyanan aron malikayan ang disgrasya.